莊偉忠：公司越大 飯桶越多

高高高層朋友面對工作麻煩，WhatsApp求助，問道於盲，我咁樣答佢：

公司越大，飯桶越多，政治動物也多，避無可避。好人講原則，壞人講利益，所以要識玩。

以前當做遊戲一部份，用平常心鬥智鬥力，技術擊倒呢啲麻煩友，其實幾好玩，但係嘥時間。

𠵱家專登令所有人知道，千其唔好攪我，因為我隨時發作，癲起上嚟，連自己都驚，唔會畀面任何人。

對付高級廢人，可以採取「不合作」姿態，可以唔理就唔理，一定要回應嘅，就一句起兩句止，真係殺到埋身，就同佢死過，要令班友仔明白，你唔係好惹，可以隨時見到、聯絡到最高負責人，等佢哋投鼠忌器。

但係如果騷擾嚟自最高負責人，咁就要把握機會，令佢明白自己嘅實力、貢獻同埋金錢買唔到嘅尊嚴，隨時可以執包袱鬆人，當佢知道你不為名利所動，反而忌你三分，講說話都會客氣啲。如果情況繼續，只有選擇走人。

故意隔日回覆你，因為好多問題，瞓醒之後，有時唔見咗，唔同咗，或者細咗。

如果朋友見到呢段文字，希望佢唔好見怪，我淨係想話畀低級過佢嘅人知，其實，唔理乜嘢職級，一樣會遇到好多唔同嘅麻煩啫，學下體諒人哋，順便分享吓我嘅處理方法，希望對佢哋有啲啲幫助。

原文刊於莊偉忠facebook。